Oliy Majlis Senatining o‘ninchi yalpi majlisida “O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi qonun ma’qullandi.

Qonunga muvofiq, endilikda mahkumlar tuzalish yo‘liga o‘tgan taqdirda ularning jazoni o‘tash muddati qisqartiriladi.

Xususan, Respublika Ma’naviyat va ma’rifat markazi tomonidan tasdiqlangan ro‘yxatdagi kitoblarni o‘qib, bilimini imtihon orqali tasdiqlagan har bir mahkumning jazosi 3 kunga qisqartiriladi. Bu tartib bir yil davomida eng ko‘pi bilan 30 kungacha qo‘llanadi.

Mazkur norma jazodan muddatidan oldin shartli ravishda ozod qilinishi mumkin bo‘lgan mahkumlarga (umrbod ozodlikdan mahrum etilganlardan tashqari) tatbiq etiladi.

Qonun amalda hozirda jazoni ijro etish muassasalarida jazo muddatini o‘tayotgan 13,5 mingdan ortiq mahkumga tatbiq etiladi.

• Jazo
• Kitob
• Mahkum
• Qonun
• Senat