Hukumat huzuridagi Madaniy merosni himoya qilish inspeksiyasi hamda Madaniy meros agentligi tomonidan “Sitorai Mohi Xossa” tarixiy majmuasidagi restavratsiya ishlari holati o‘rganilganda, taʼmirlash ishlari madaniy meros obyektlarini restavratsiya qilish talablariga zid ravishda olib borilgani aniqlandi.

Xususan, taʼmirlash-restavratsiya loyihalari maxsus Ilmiy-ekspert kengashi bilan kelishilmagan, tegishli ruxsatnomalar olinmagan va yana bir qator talablar qo‘pol ravishda buzilgan. Majmuada restavratsiya ishlari noto‘g‘ri olib borilgani tufayli saroyning bir qator qismi tarixiy va badiiy ahamiyatini butkul yo‘qotgan. 

Agentlik tomonidan o‘rganish ishlari yakunlari huquqiy baho berish uchun Bosh prokuraturaga taqdim etildi.  Ayni vaqtda Bosh prokuratura tomonidan mazkur holatlar bo‘yicha mutasaddi mansabdor shaxslarga nisbatan jinoyat ishi qo‘zg‘atilib, ularning harakatlariga huquqiy baho berilmoqda.

Taʼkidlanishicha, 2019-2020-yillarda majmuada qiymati 8 mlrd. so‘mlik taʼmirlash va restavratsiya ishlari olib borilgan.

Maʼlumot uchun, Sitorai Mohi Xossa Buxoro amirlarining yozgi saroyi hisoblanib, asosiy binolar amir Mir Sayyid Olimxon (1911-1920-yillar) hukmronligi davrida qurilgan. Hozirda muzey sifatida faoliyat yuritayotgan majmuaga yiliga 158 ming (shundan 63 ming nafari xorijiy) sayyoh tashrif buyuradi.

Eslatib o‘tamiz, avvalroq ham Sitorai Mohi Xosa meʼmoriy yodgorligiga qayta taʼmirlashlar jarayonida 28 mlrd so‘mlik zarar yetkazilgani aytilgan edi.

• Buxoro
• Sitorai Mohi Xossa
• Tarix
• yodgorlik