O‘zbekistonda iyulning jazirama issiq kuzatilgan kunlarida respublika bo‘yicha tez tibbiy yordam xizmatiga jami 247 ming 459 ta chaqiriq kelib tushdi. Bu haqda Sog‘liqni saqlash vazirligi matbuot xizmati xabar berdi.

Respublika tez tibbiy yordam markazi direktori Abduvoitjon Gafurovning ta’kidlashicha, jazirama ob-havo sharoitida, eng avvalo, surunkali kasalligi bo‘lgan, dispanser nazoratida turuvchi bemorlar, yosh bolalar, homilador ayollar va keksalar salomatligiga alohida e’tibor talab etiladi. Shu bois ular sog‘lig‘ini tibbiy nazoratga olish, zarurat bo‘lganda shoshilinch tibbiy yordam ko‘rsatish lozim.

“Raqamlarga to‘xtalsak, o‘tgan haftada, ya’ni anomal issiq kuzatilgan davrda respublika bo‘yicha tez tibbiy yordam xizmatiga jami 247 ming 459 ta chaqiriq kelib tushdi. Ularning 172 ming 676 tasini shoshilinch ko‘rsatma, 65 ming 163 tasini esa surunkali kasalliklar bilan bog‘liq murojaatlar tashkil etdi”, – deydi mutaxassis.

Uning so‘zlariga ko‘ra, tegishli mas’ul tashkilotlar tomonidan OAV va ijtimoiy tarmoqlar orqali fuqarolarga anomal issiq havo sharoitida ehtiyot choralarini ko‘rish to‘g‘risida berilgan tavsiyalar tufayli chaqiriqlar soni undan oldingi haftaga (24—29-iyun) nisbatan 1,2 foizga kamaygan.

Shu o‘rinda vazirlik zarurat bo‘lmasa, aholidan jazirama payti tashqariga chiqmaslikni, tez-tez suyuqlik ichish, imkon qadar yog‘li, dudlangan taomlar tanovul qilmaslik, aksincha ko‘proq meva va sabzavotlar iste’mol qilishni tavsiya etgan.

• Jazirama
• SSV
• anomal issiq
• xabar