Toshkent shahrida o‘quvchilarning maktabga qanday qatnashi va maktab avtobuslariga ehtiyoj mavjudligi o‘rganilmoqda. Bu haqda Yo‘l harakatini tashkil etish markazi ma’lum qildi.

Markaz tomonidan 5-sentyabr kuni so‘rovnoma o‘tkazilgan. Undan ko‘zlangan maqsad poytaxtda maktab avtobuslarini yo‘lga qo‘yish imkoniyatlarini o‘rganish, ularga bo‘lgan ehtiyojni aniqlash va zaruratdan kelib chiqib tizimni joriy etish masalasini ko‘rib chiqishdan iborat.

So‘rovnomada ota-onalardan quyidagi ma’lumotlarni ko‘rsatish so‘ralmoqda:

• yashash manzili;

• farzandi tahsil olayotgan maktab va sinfi;

• maktabga chiqish vaqti;

• foydalaniladigan transport turi;

• maktab avtobusiga ehtiyoj bor yoki yo‘qligi.

Oilada bir nechta farzand bo‘lsa, ularning ma’lumotlari alohida kiritiladi.

Markaz ma’lumotlariga ko‘ra, so‘rovnoma davomida shaxsiy ma’lumotlar yig‘ilmaydi. Olingan natijalar faqat umumiy tahlil va maktab qatnovini tashkil etish bo‘yicha qarorlar qabul qilish uchun foydalaniladi.

Qayd etilishicha, o‘quv yili boshlanishi bilan maktablar va boshqa ta’lim muassasalari atrofida transport hamda piyodalar harakati sezilarli darajada ortadi. Bu ayrim ko‘chalarda tirbandliklar yuzaga kelishiga sabab bo‘lishi mumkin.

Avvalroq, 2025-yil avgust oyida Xalq deputatlari Toshkent shahri kengashi sessiyasida poytaxtda maktab avtobuslarini yo‘lga qo‘yish imkoniyatlari muhokama qilingan edi.

Shuningdek, “O‘zbekiston — 2030” strategiyasida olis va chekka hududlarda joylashgan 715 ta maktab o‘quvchilari uchun bepul maktab avtobuslarini yo‘lga qo‘yish belgilangan.