Donald Tramp Truth Social ijtimoiy tarmog‘ida yozishicha, Xitoy Kanada biznesini, ijtimoiy tuzilmasini va turmush tarzini vayron qiladi.

“Xitoy Kanadani tiriklayin yeydi, uni to‘liq yutib yuboradi”, — deb yozadi Qo‘shma Shtatlar rahbari.

Avvalroq Reuters agentligi Kanada va Xitoy ayrim mahsulotlar bo‘yicha bojlarni kamaytirish yuzasidan dastlabki kelishuvlarga erishganini xabar qilgandi. Xususan, Ottava 2024-yilda joriy etilgan 100 foizlik boj o‘rniga taxminan 6,1 foizlik imtiyozli stavka asosida 49 mingtagacha Xitoy elektromobillarini import qilishga rozi bo‘lgan. Pekin esa o‘z navbatida Kanadaning bir qator qishloq xo‘jaligi mahsulotlariga qo‘yilgan bojlarni sezilarli darajada pasaytirishga rozilik bergan.

Reuters ma’lumotlariga ko‘ra, bu qadamlar Kanadaning Xitoy bilan savdo munosabatlarini tiklash va tashqi savdoni diversifikatsiya qilishga qaratilgan sa’y-harakatlarining bir qismi bo‘lib, bu jarayon global keskinlik ortib borayotgan va AQSh bilan savdo ixtiloflari kuchaygan bir paytda amalga oshirilmoqda.

20-yanvar kuni Davosda bo‘lib o‘tgan Jahon iqtisodiy forumida so‘zga chiqqan Kanada bosh vaziri Mark Karni jahon iqtisodiy va siyosiy tizimi o‘zgarib borayotgani, hamda yetakchi davlatlar belgilangan qoidalarga rioya qilishdan bosh tortgani sababli “jahon tartibi parchalanishi” haqida gapirdi. Uning so‘zlariga ko‘ra, dunyo geosiyosat xalqaro me’yorlar bilan cheklanmay qo‘ygan “shafqatsiz reallik” bosqichiga kirdi.

Shu bilan birga, Karni o‘rta darajadagi davlatlar, jumladan Kanada, ojiz emasligini va yangi jahon tartibini shakllantirishda ishtirok etish imkoniyatiga ega ekanini ta’kidlagan edi.

• AQSh
• Kanada
• Tramp
• Xitoy
• savdo