Yevropa Ittifoqi Rossiyaning Ukrainaga qarshi urushi sabab mamlakatga navbatdagi – 20-sanksiyalar paketini ishlab chiqishga kirishdi. Bu masala Litva Moliya vaziri Kristupas Vaytekunas va Yevropa komissiyasining moliyaviy xizmatlar hamda Jamg‘arma-investitsiya ittifoqi bo‘yicha komissari Mariya Luish Albukerke o‘rtasida muhokama qilingani haqida Litva Moliya vazirligi ma’lum qildi.

Vaytekunasga ko‘ra, Yevropa Ittifoqi bosimni faqat Rossiyaga emas, balki Belarusga ham kuchaytirishi lozim, chunki u “doimiy gibrid hujumlar”ni amalga oshirmoqda.

“Quvonarlisi, oktyabr oyi yakunida YeI darajasida 19-sanksiyalar paketi kelishib olindi. Lekin, ayniqsa Rossiyaning energetika va moliya sektorlariga nisbatan bosimni yanada kuchaytirish lozim. Shu sababdan biz navbatdagi sanksiyalar bo‘yicha jiddiy muhokamalarni boshlashimiz kerak”, – degan Litva vaziri.

Uning ta’kidlashicha, Yevropa Ittifoqi Belarusga nisbatan choralarni qattiqlashtirib, ularni Rossiyaga nisbatan amal qilayotgan sanksiyalar darajasiga olib chiqishi va qo‘shimcha cheklovlar joriy etishi kerak. Albukerkening so‘zlariga ko‘ra, Minskka nisbatan yangi choralarni tayyorlash jarayoni hali dastlabki bosqichda.

“Biz uchinchi davlatlar bilan hamkorlik qilyapmiz, chunki ular orasida sanksiyalarni aylanib o‘tishga yordam beruvchi mamlakatlar ham bor”, – degan Yevropa komissari.

Ma’lumot uchun, YeI so‘nggi, 19-sanksiyalar paketini 23-oktyabrda tasdiqlagan edi.

• Rossiya
• Sanksiya
• Yevropa Ittifoqi