Давлат қабул комиссияси баёнига мувофиқ, 2025/2026-ўқув йили учун бакалавриат таълим йўналишларида вакант қолган ўринларга қўшимча қабул амалга оширилади.

Бу имконият 2 та тоифа абитуриентлар учун берилади:

– 2025 йилги кириш имтиҳонларида 56,7 балл ва ундан юқори натижа кўрсатган, бироқ талабаликка тавсия этилмаганлар, яъни ўқишдан йиқилганлар;

– рўйхатдан ўтишнинг иккинчи босқичида олий таълим ташкилоти ва бакалавриат таълим йўналишларини танламаган абитуриентлар, яъни ўтган сафар турли сабабларга кўра йўналиш танлашни эсдан чиқариб қўйганлар.

Ушбу 2 та тоифа учун қуйидаги имкониятлар берилади:

– давлат олий таълим ташкилотларида қолган вакант бакалавриат таълим йўналишларига танловда иштирок этиш учун 2025 йил 25 сентябрдан 3 октябрга қадар (шу куни ҳам) my.uzbmb.uz сайти орқали онлайн рўйхатдан ўтиш имконияти яратилади;

– рўйхатдан ўтган абитуриентлар тўплаган баллари кетма-кетлигига қатъий риоя қилинган ҳолда вакант ўринларга базавий тўлов-контракт асосида талабаликка тавсия этилади;

– рўйхатдан ўтиш жараёнида фанлар мажмуаси мос бўлган бакалавриат йўналишини танлаш имконияти берилади; танлов натижалари бўйича қайдномалар 2025 йил 8 октябрга қадар чоп этилиб, тегишли олий таълим ташкилотларига талабаликка қабул қилиш бўйича ҳужжатларни расмийлаштириш учун етказилади.

• Имтиҳон
• ОТМ
• абитуриент