5 апрель куни Самарқанд иқлим форуми доирасида “Марказий Осиёда иқлим ўзгариши шароитида сув ресурсларини интеграциялашган ҳолда бошқариш” мавзусидаги панель сессияси бўлиб ўтади.

Муҳокамада Ўзбекистон Республикаси Сув хўжалиги вазири Шавкат Ҳамроев, Тожикистон Республикаси энергетика ва сув хўжалиги вазирининг биринчи ўринбосари Жамшид Шоимзода, Қозоғистон Республикаси сув хўжалиги ва ирригация вазири Нуржан Нуржигитов, Туркманистон сув хўжалиги давлат қўмитаси раиси Дурди Генджиэв, Қирғиз Республикаси сув ресурслари, қишлоқ хўжалиги ва қайта ишлаш саноати вазири Бахит Торобоев, БМТ Бош котибининг Марказий Осиё бўйича махсус вакили, БМТнинг Марказий Осиёда низоларнинг олдини олиш бўйича минтақавий маркази раҳбари Каха Имнадзе, ГИЗ минтақавий дастур директори Каролин Милов иштирок этади.

Учрашувдан кўзланган мақсад минтақавий ҳамкорликни мустаҳкамлаш, сувни тежайдиган технологияларни жорий этиш, инфратузилмани модернизация қилиш, иқлим ўзгаришига мослашиш, молиялаштириш, глобал кун тартибига интеграциялашув ва бошқа долзарб масалаларни муҳокама қилишдан иборат.

Маълумот учун, Марказий Осиёнинг ижтимоий-иқтисодий ва экологик барқарорлиги сув ресурсларини оқилона бошқаришга боғлиқ. Трансчегаравий дарёлар тизими (Амударё, Сирдарё) негизида жойлашган минтақа иқлим муаммоларига дуч келмоқда: музликларнинг эриши, беқарор ёғингарчилик, ҳароратнинг ошиши. Бу омиллар Собиқ иттифоқ давридан мерос бўлиб қолган сув тақсимотидаги тарихий қарама-қаршиликларни ва қишлоқ хўжалиги, энергетика ва экотизимлар ўртасидаги рақобатни кучайтиради. Орол денгизининг ҳалокатли қуриши сувдан норационал фойдаланиш оқибатларини эслатиб туради.

Ялпи мажлис давомида иштирокчилар келажак авлодлар учун сув хавфсизлигини таъминлашда иқлим мослашуви билан минтақавий ҳамкорликни уйғунлаштирган сув ресурсларини комплекс бошқариш стратегияларини муҳокама қиладилар.

• Самарқанд
• саммит
• сессия