Ўзбекистоннинг Истанбул шаҳридаги Бош консулхонаси маълумотларига кўра, аввал Дурдона Ҳакимованинг ўлими билан боғлиқ ҳодисадан сўнг бедарак йўқолган деб топилган фуқаро - 1994 йилда Наманган вилоятида туғилган Эргашалиева Сайёранинг вафот этганлиги аниқланган. У Ҳакимованинг яқин дугонаси бўлган.

Тергов жараёнида гумонланувчилар Эргашалиева юзасидан кўрсатма беришдан бош тортганликлари қайд этилган.

Дастлабки маълумотларга кўра, жорий йил 22 январь куни марҳумалар ҳамда гумонланувчилар Фотиҳ туманида жойлашган ресторанларда тушлик қилган. Учрашув давомида Эргашалиева ва Г.К. ўртасида келишмовчилик юзага келган. Можаро Эргашалиеванинг Ўзбекистонга қайтиш нияти билан боғлиқ масалада келиб чиққан. 23 январь куни Т.Д. ва К.Г. ўзаро тил бириктириб Эргашалиевани аввал пичоқ билан ўлдириб, танани бир неча қисмларга бўлиб Фотиҳ туманидаги ахлат қутиларига ташлаган.

24 январь куни қотиллар Эргашалиеванинг телефонидан Ҳакимовага SMS хабар юбориб, уни ҳам чақирган ва уни ҳам пичоқ тиқиб ўлдириб, танани бир нечта қисмларга бўлиб, Шишли туманидаги ахлат қутиларига ташлаган.

Эргашалиеванинг жасади топилганлиги ҳақида ОАВ да маълумот тарқалди. Бироқ Истанбул Суд тиббий экспертизасига ҳозирча жасад олиб келинмаган.

“Марҳуманинг оила аъзолари ва яқинларига чуқур ҳамдардлик билдирамиз. Қўшимча маълумотлар аниқлаштирилиши билан жамоатчилик хабардор қилинади”, – дейилади хабарда.

• Ўзбекистон
• Қотиллик
• Туркия