Бугун 11 август ҳафтанинг бошланиши ва навбатдаги оддий кунлардан бири. Аммо бу кун ўзбек футболи учун тарихдаги ўчмас доғлардан бири сифатида сақланиб қолган. Сезиб турганингиздек, бу мақола нафақат ҳар йили айни бир кунда, балки ҳар қайси пайтда қайғу ва энтикиш билан йодга оладиганимиз “Пахтакор-79” ҳақида.

Бундан роппа-роса 46 йил аввал бутун ўзбек халқини юрагини ларзага солган воқеа юз беради. Днепродержинск осмонида “Пахтакор” футболчилари ҳам бўлган ТУ-134 авиалайнери худди шу русумдаги бошқа бир самолёт билан тўқнашиб кетади. Натижада икки ҳаво лайнерида бўлган жами 178 киши ҳалок бўлади.

Бу воқеага ҳали-ҳануз  кўпчилик қандайдир ташқи омилларни сабаб сифатида ҳисобласа-да, ҳалокат ҳақидаги воқелар кетма-кетлиги барча учун тушунарли тарзда қуйидагича баён қилинса мақсадга мувофиқ:

Тошкент-Минск йўналишида парвоз қилаётган ТУ-134 самолётида 6 нафар экипаж аъзоси бор бўлган. Бош учувчи ҳисобланган Сергеев ўз ўрнига ёш ва ҳали анча тажрибасиз ҳисобланган Н. Жуковскийни тайинлайди. Ўша кун хотирланишича, об-ҳаво ҳам унча яхши бўлмаган. Ҳаво анча булутли ва кўриш масофаси жуда қисқа эди. Москвадан соат 13:11 ларда ҳавога кўтарилган ТУ-134 лайнери 13:35 да айнан шундай русумли самолёт билан тўқнашиб кетади.

Ҳар икки самолёт учувчилари қалин булут туфайли қаршисидаги самолётни кўриш имкониятига эга эмасди. 8300 метр баландликда Молдова самолёти Минскка қарашли самолётнинг қанот қисмига келиб урилган. Комаров “Пахтакор” учаётган лайнер бошқарувини 4500 метр баландликкача герметизация бузилган ҳолатда ҳам ушлаб турган, бироқ шундан кейин самолёт кескин равишда қулашни бошлаган.

Ҳалокат ҳақида илк бор ўша пайт ҳаводаги  АN-2 самолёти экипажи хабар беради: “Куриловка ҳудудида қулаётган самолёт қисмлари кўзга ташланмоқда. Менимча, бу ТУ-134 парчалари”

Ушбу ҳалокатдан жуда кўпчилик ўзини йўқотиб қўйган. Чунки ўша мавсумда “Пахтакор” ишончли ўйин кўрсатиб, юқори ўринлардан жой эгаллашга ҳақли эканлигини исботлаб келаётганди. Ҳатто, баъзи мутахассислар жамоанинг яқин йиллар ичида еврокубокларда ўйнаши мумкинлиги тўғрисида тахмин қилаётганди.

Бу воқеа ҳақида жуда кўп ва ҳўп гапириш мумкин. Аммо ҳеч бир тасалли, ҳеч бир юпанч дардларга тасалли бўла олмайди. Лекин, осмонда қолган абадий юлдузлар қалбларда мангу яшайди.

Шу ўринда ўша фожиа сабаб ҳалок бўлган “Пахтакор”нинг 17 нафар аъзосини номларини келтирсак:

Идгай Тазетдинов  13.01.1933 Мураббий

Владимир Чумаков  08.12.1932 Шифокор

Мансур Толибжонов 04.04.1944 Маъмур

Михаил Ан 19.11.1952 Ярим ҳимоячи

Владимир Фёдоров  05.01.1956 Ҳужумчи

Олим Аширов   25.01.1955 Ҳимоячи

Равил Агишев   14.03.1959 Ҳимоячи

Константин Баканов 25.05.1954 Ярим ҳимоячи

Юрий Загуменних  07.06.1947 Ҳимоячи

Александр Корчёнов  04.05.1949 Ярим ҳимоячи

Николай Куликов  25.04.1953 Ҳимоячи

Владимир Макаров  09.03.1947 Ярим ҳимоячи

Сергей Покатилов 20.12.1950 Дарвозабон

Виктор Чуркин   25.01.1952 Ҳужумчи

Сирожиддин Бозоров  10.08.1961 Ҳужумчи

Шуҳрат Эшбўтаев  08.02.1959 Ҳужумчи

                                                                                        Мақола муаллифи: Ҳумоюнмирзо Эргашев

• Авиаҳалокат
• Пахтакор
• Тошкент
• Xotira