Португалия миллий терма жамоасининг собиқ бош мураббийи Пауло Бенту Ўзбекистон термасининг бошқарувига келиши мумкин.

“Football Asian” нашрининг хабарига кўра, ҳозирда мураббий билан музокаралар жараёни кетмоқда. Яқин кунларда Бентунинг ҳал қилувчи қарорини билиш мақсадида якуний музокаралар босқичи ўтказилиши кутилмоқда.

Шунингдек, тасдиқланмаган маълумотларга кўра, мутахассис яқин кунларда бошланадиган “CАFА Nations Cup-2025” мусобақаси пайтида термамизнинг ўйинларини кузатгани ташриф буюриши ҳам мумкин. Аммо айтиб ўтганимиздек, бу ҳозирча тасдиқланмаган маълумот саналади.

Аввалроқ, ЎФА Йоаҳим Лёв ва Фотиҳ Терим каби мураббийларга ҳам таклиф билан чиққан, лекин ижобий жавоб олмаган эди.

57 ёшли Пауло Бенту фаолияти давомида 2010-2014 йиллар орасида Португалия миллий терма жамоасини бошқарган ва “Евро-2012” баҳсларида ярим финалга қадар етиб борган.

Кейинчалик Осиё қитъасида Жанубий Корея терма жамоаси билан “ЖЧ-2022” мусобақасида муваффақиятли иштирок этган. Унинг охирги иш жойи БАА терма жамоаси ҳисобланади. Бенту у ердан май ойидан истеъфога чиққанидан бери ҳозирча ишсиз юрибди.

Шунингдек, мураббий Бразилиянинг “Крузейро”, Грециянинг “Олимпиакос”, Хитойнинг “Чонконг Лифан” клубларида ҳам фаолият олиб борган.

• Футбол
• Португалия
• Спорт
• терма жамоа