Бош прокуратура томонидан ҳудудий Давлат хизматлари марказларидан бирининг ходимлари ҳамда ҳайдовчилик гувоҳномаларини қалбакилаштиришда гумонланаётган бошқа шахсларга нисбатан қўзғатилган жиноят иши юзасидан тергов ҳаракатлари олиб борилди.

Аниқланишича, Давлат хизматлари маркази мутахассиси жиноий шериклари билан биргаликда жорий йил давомида транспорт воситасини бошқариш ҳуқуқига эга бўлмаган фуқароларга сохта ҳайдовчилик гувоҳномаларини расмийлаштириб келган. У жами 72 нафар фуқародан 616 миллион сўм миқдорида пул олган.

Жиноий гуруҳ қалбаки ҳайдовчилик гувоҳномаларини расмийлаштиришда икки хил усулдан фойдаланган.

Биринчи ҳолатда, 500–1000 АҚШ доллари эвазига учинчи шахслар орқали эски намунадаги қалбаки ҳайдовчилик гувоҳномалари қўлбола усулда тайёрланиб, фуқароларга берилган. Шундан сўнг, туман Давлат хизматлари маркази ходимига пора бериш орқали ушбу сохта гувоҳномалар гўёки фуқаролар томонидан тақдим этилгандек расмийлаштирилиб, уларга янги ҳайдовчилик гувоҳномалари берилган.

Иккинчи ҳолатда эса, 10 минг АҚШ долларигача бўлган маблағ эвазига фуқароларнинг ҳайдовчилик гувоҳномасига эгалиги тўғрисидаги ҳудудий ЙҲХБ маълумотномалари қалбаки имзо ва ҚР-кодлар билан тайёрланиб, фуқароларга топширилган. Кейинчалик, туман Давлат хизматлари маркази ходимига пора бериш орқали ушбу ҚР-кодли сохта ҳужжатлар асосида янги ҳайдовчилик гувоҳномалари расмийлаштирилган.

Бош прокуратура томонидан ҳудудларда ўтказилган ўрганишлар давомида 1200 дан ортиқ қалбаки ҳайдовчилик гувоҳномалари аниқланган. Уларнинг энг кўп қисми Тошкент шаҳрида — 440 та ҳолатни ташкил этади.

Юқоридаги барча ҳолатлар юзасидан жиноят ишлари қўзғатилган. Фуқаролар томонидан қалбаки ҳужжатлар асосида олинган ҳайдовчилик гувоҳномалари бекор қилинган.

• Бош прокуратура
• Жиноят
• Пора
• prava