Рим папаси Лео XIV Исроил ва Фаластин халқи ўртасидаги ўн йиллар давом этган можаронинг ягона ечими Фаластин давлатини тан олиш эканини айтди. Бу ҳақда Reuters хабар берди.

Қайд этилишича, америкалик биринчи папа Лео Туркиядан Ливанга учаётган самолётдаги журналистларга Исроил ва Фаластин давлатлари ўртасидаги можаро тўғрисида гапирди.

“Биз ҳаммамиз биламизки, ҳозирда Исроил ҳали ҳам бу ечимни қабул қилмаяпти, лекин биз буни ягона ечим деб биламиз. Биз Исроил билан ҳам дўстмиз ва биз икки томон ўртасида воситачи овоз бўлишга интиламиз, бу уларга ҳамма учун адолат билан ечим топишга ёрдам беради”, – деган папа.

Шунингдек, Рим папаси 8 дақиқалик қисқа матбуот анжуманида 1,4 млрд аъзоси бор бўлган католик черковининг раҳбари сифатида май ойида сайланганидан кейин биринчи чет эл сафарида Туркияга ташрифи ҳақида ҳам гапирган.

Рим папасининг айтишича, у Туркия Президенти Ражаб Тоиб Эрдўған билан Исроил-Фаластин ва Украина-Россия можароларини муҳокама қилган. 

“Туркия иккала урушни тугатишда муҳим роль ўйнайди”, – деган Рим папаси.

Суҳбат давомида у Туркияни диний ҳамкорликнинг намунаси сифатида мақтаб, Туркияни турли динга мансуб одамлар тинч-тотув яшай оладиган мамлакат сифатида эътироф этган. 

• Фаластин
• Isroil
• Италия
• Rim papasi