“Шавкат Мирзиёевнинг Хитой Халқ Республикасига расмий ташрифининг тадбирларга бой дастури 3 сентябрь куни якунига етди”, – деб хабар берди Президент матбуот хизмати.

Президент 31 август куни рафиқаси билан бирга Тянсзин шаҳридаги “Мейсзян” конгресс марказида Шанхай ҳамкорлик ташкилоти саммитининг норасмий тадбирларида қатнашди. Ўзбекистон раҳбари 1 сентябрь куни ШҲТ Давлат раҳбарлари кенгашининг навбатдаги йиғилиши ва “ШҲТ плюс” форматидаги учрашувда қатнашиб, кўп томонлама ҳамкорликни янада мустаҳкамлаш ҳамда ташкилот фаолиятини такомиллаштириш бўйича қатор ташаббусларни илгари сурди.

2 сентябрь куни Пекин шаҳрида Хитой Халқ Республикаси раиси Си Сзинпин билан расмий делегациялар иштирокида музокаралар бўлиб ўтди. Учрашув якунида амалий ҳамкорликнинг устувор йўналишлари бўйича икки томонлама ҳужжатларнинг салмоқли тўплами имзоланди.

Шунингдек, Шавкат Мирзиёев Россия президенти Владимир Путин билан учрашиб, икки томонлама ҳамкорликнинг долзарб масалаларини муҳокама қилди. Давлат раҳбари Хитой бош вазири Ли Сян, хорижий делегациялар раҳбарлари ва ишбилармон доиралар вакиллари билан ҳам самарали учрашувлар ўтказди.

Ўзбекистон президенти 3 сентябрь куни Пекин шаҳрида Иккинчи жаҳон уруши якунланганининг 80 йиллиги муносабати билан ўтказилган Ғалаба парадида иштирок этди.

Ташриф тадбирлари якунлангач, давлат раҳбари Тошкентга жўнаб кетган.

• Шавкат Мирзиёев
• Ташриф
• Хитой