Ҳар ҳафтанинг сешанба оқшомида chess.cом платформасида дунёнинг кучли гроссмейстерлари иштирокида Titled Tuesday онлайн блиц турнири ўтказилади.

Мусобақада фақат расмий шахмат унвонига (GM, IM, FM ва бошқалар) шахматчилар иштирок этади. Турнир формати швейтсарча тизимда 11 раунддан иборат бўлиб, ҳар бир партия 5 дақиқа вақт назорати билан ўйналади. 

Кечаги турнирда ўзбекистонликлар орасида энг яхши натижани Жавоҳир Синдаров қайд этди. Гроссмейстер 5-тургача юз фоизлик натижа билан пешқадамлик қилди. Аммо кейин вақти тушиб кетганлиги учун икки мағлубиятни қабул қилиб олди. 

Шунга қарамай, сўнгги турларни ўз фойдасига ҳал қилиб, 11 имкониятдан 9 очко тўплади. Сўнгги турда қора доналарда ўйнаганига қарамай, жаҳон тождори Магнус Карлсенни ҳам мағлуб этишни уддалади. Жавоҳир фақат қўшимча кўрсаткичларга кўра 6-ўринни эгаллади. Совринли учинчи ўринни банд этган Денис Лазовик ҳам Синдаров сингари 9 очко жамғарди. Турнир чемпионлиги 9,5 очко тўплаган франциялик Максим Ваше-Лагравга насиб этди. Шунча очкога эга полшалик Ян-Криштоф Дуда эса иккинчи поғонадан жой олди. 

Маълумот учун, Жавоҳир Синдаров икки ҳафта аввал ушбу турнирда 9,5 очко жамғариб, чемпион бўлганди.

• Шахмат
• turnir