Депутат Кушербаевга кўра, Юнусобод туманида фуқаролар томонидан тадбиркорлик фаолияти учун қурилган қурилмаларни бузиш ишлари ноқонуний амалга оширилган.

У ўз фикрини асослар экан, Вазирлар Маҳкамасининг 2017 йил 5 июлдаги 467-сон қарори билан тасдиқланган низомда келтирилган тартибни эслатиб ўтади.

Унга кўра эса ўзбошимчалик билан қурилган иморатларни аниқлаш ҳамда уларни бузиб ташлашни ташкил этиш соҳасидаги ваколатли давлат органларига ҳокимият, кадастр, архитектура, экология ва маданий мерос департаменти киради.

“Бу ерда прокуратурага ҳам, ички ишлар органларига ҳам ўзбошимча қурилмани буздириш ваколати берилмаган”, – деб ёзади Кушербаев.

Шунингдек, ўзбошимча қурилма аниқланган тақдирда низомга кўра, қурилмани ўн беш кунлик муддатда ихтиёрий бузиб ташлаш тўғрисида далолатнома тузилиб, қурилма эгаси огоҳлантирилиши шарт.

Агар ушбу муддатда фуқаро бу қурилмага нисбатан мулк ҳуқуқини эътироф этиш тўғрисида судга даъво берса, даъво берилган кундан бошлаб суднинг якуний қарори қабул қилинишига қадар ушбу иморатни бузиш тўхтатиб турилади.

Ўзбошимча қурилмани бузиб ташлаш учун белгиланган муддат тугаганидан сўнг ваколатли орган икки иш кунида бу тўғрисида туман (шаҳар) ҳокимлиги ҳузуридаги Ер участкаларини бериш масалаларини кўриб чиқувчи комиссияга хабарнома киритади.

Комиссия уч иш куни мобайнида тартибга асосан, ўзбошимча қурилмани бузиб ташлаш тўғрисидаги туман (шаҳар) ҳокимининг даъво аризасини судга киритади.

“Токи суднинг якуний қарори чиқмагунга қадар ҳеч бир орган ёки шахс фуқароларнинг қурилмаларини ўзбошимча деб, шикаст етказиши, бузиши ва босим ўтказиши мумкин эмас!

Юнусобод туманида содир бўлган ҳолатда прокуратура ва ички ишлар органлари масъул ходимлари мансаб ваколатидан четга чиқиб, фуқароларнинг ҳуқуқлари кўпол даражада бузилишига йўл қўйишган. Бу жиноий жавобгарлика сабаб бўлиши мумкин.

Шу муносабат билан, Бош прокуратура ва Ички ишлар вазирлиги ўз тизимининг қуйи бўғинида содир этилаётган ушбу қонунбузилиши ҳолатига ҳуқуқий баҳо бериб, қонуний чоралар кўриши шарт, деб ҳисоблаймиз”, – дейди депутат.

Расул Кушербаев, шунингдек, Ўзбекистон айни пайтда “Ҳукумат суд қарорисиз ва адолатли товон пулисиз мулкни мусодара қилмаслик” рейтингида 139 та давлат ичида 138-ўринда турганлигини эслатиб ўтмоқда.

Эслатиб ўтамиз, Xabardor.uz бир муддат олдин мазкур масалани ўрганишни бошлаган ва айрим маълумотларни очиқлаган эди. 

• Депутат
• Снос
• Тошкент