FIFA томонидан 2025 йилнинг рамзий терма жамоаси эълон қилинди. Йил рамзий жамоасидан қуйидаги футболчилар ўрин олди: дарвозабон — Жанлуижи Доннарумма (“Манчестер Сити”); ҳимоячилар — Ашраф Ҳакими (“ПСЖ”), Виллиан Пачо (“ПСЖ”), Виржил Ван Дейк (“Ливерпул”), Нуну Мендеш (“ПСЖ”); ярим ҳимоячилар — Коул Палмер (“Челси”), Жуд Беллингем (“Реал Мадрид”), Витиня (“ПСЖ”), Педри (“Барселона”); ҳужумчилар — Ламин Ямал (“Барселона”) ва Усмон Дембеле (“ПСЖ”).

Франция терма жамоаси ва “ПСЖ” ҳужумчиси Усмон Дембеле эса Халқаро футбол федерациялари ассоциацияси (ФИФА) томонидан 2025 йилнинг энг яхши футболчиси сифатида эътироф этилди. Ушбу мукофот The Best FIFA Фоотбалл Awards маросими доирасида топширилди.

Ортда қолган мавсумда Дембеле “ПСЖ” сафида Лига 1, Франция Кубоги ва Суперкубогини қўлга киритди, шунингдек, ЕЧЛ ғолибига айланди. Бундан ташқари, француз гранди билан Клублар ўртасидаги Жаҳон чемпионати финалига қадар етиб борди. Шунингдек, у France Football нашри томонидан топшириладиган 2025-йилги “Олтин тўп” мукофотига ҳам сазовор бўлди.

2024/25-йилги мавсум давомида 28 ёшли ҳужумчи барча мусобақаларда жами 53 та учрашувда майдонга тушиб, 35 та гол урди ва 16 та голли узатма амалга оширди.

“ПСЖ” бош мураббийи Луис Энрике ФИФА талқинига кўра 2025 йилнинг энг яхши мураббийи деб топилди. Ушбу номинация учун, шунингдек, Ҳанс-Дитер Флик (“Барселона”), Энсо Мареска (“Челси”), Микел Артета (“Арсенал”), Арне Слот (“Ливерпул”), Роберто Мартинес (Португалия терма жамоаси) ва Хавер Агирре (Мексика терма жамоаси) ҳам даъвогарлик қилган эди.

Шунингдек, аёллар футболи бўйича ҳам йилнинг энг яхшилари аниқланди. 2025 йилнинг энг яхши аёл футболчиси сифатида “Барселона” ярим ҳимоячиси Аитана Бонмати эътироф этилди. Энг яхши мураббий мукофоти Англия терма жамоасини Евро–2025 чемпионлигига қадар олиб келган Сарина Вигманинга топширилди. Энг яхши дарвозабон сифатида эса “Челси” ва Англия терма жамоаси посбони Ханна Ҳемптон тан олинди.

Маълумот учун, The Best мукофоти совриндорлари 2024 йил 11 августдан 2025 йил 2 августгача бўлган даврдаги ўйинлар натижалари асосида аниқланиб, номзодларга терма жамоалар сардорлари ва мураббийлари, мухлислар ҳамда халқаро ОАВ вакиллари овоз берди.

• Fransiya
• Футбол
• Тақдирлаш