Яманда Эрон томонидан қўллаб-қувватланадиган ҳусийлар ҳаракати ва Саудия Арабистони бошчилигидаги коалиция томонидан қўллаб-қувватланадиган ҳукумат кучлари ўртасида Қизил денгиз соҳили назорати учун шиддатли жанглар давом этмоқда. «Тҳе Guardian» нашрининг хабар беришича, сўнгги уч куннинг ўзида мамлакатдаги тўқнашувлар ва ҳаво зарбалари оқибатида 169 нафаргача одам ҳалок бўлган.

Ҳусийлар ҳарбий вакилларининг маълум қилишича, 20-сентабрдан буён Таиз, ал-Жавф, Мариб ва Саада вилоятларидаги жанглар ҳамда Саудия Арабистонининг ҳаво ва артиллерия зарбалари натижасида камида 118 киши ҳаётдан кўз юмган. Яман ҳукумати манбалари эса ўз томонида камида 36 киши ҳалок бўлганини маълум қилган.

22-сентабр куни Моҳа порт шаҳрига берилган зарба оқибатида икки нафар бола ва тўрт нафар тинч аҳоли вакили ҳалок бўлган. Шунингдек, ал-Жавф вилоятидаги қамоқхонага берилган зарба тўққиз нафар маҳбуснинг ўлимига сабаб бўлган.

Сўнгги уч ҳафта ичида ҳусийлар томонидан бошланган кенг кўламли ҳужумлар натижасида гуруҳ Яманнинг Қизил денгиз соҳилининг катта қисмини, жумладан, жаҳон денгиз юкларининг ўн фоизи ўтадиган муҳим стратегик аҳамиятга эга Боб ал-Мандаб бўғози устидан назорат ўрнатди. Бу ҳусийларнинг сўнгги тўрт йилдаги энг йирик ҳудудий ютуқи ҳисобланади.

Мазкур ҳарбий ҳаракатлар ва Эрон томонидан Ҳурмуз бўғозининг ёпилиши жаҳон энергетика бозорларига қўшимча босим ўтказмоқда. Янги тўқнашувлар оқибатида Ямандаги гуманитар инқироз янада чуқурлашган. Ҳозирги кунда мамлакатда қарийб 22 миллион киши инсонпарварлик ёрдамига муҳтож бўлиб, 5,2 миллион киши ички кўчирилганлар қаторига қўшилган. Можаролар бошланганидан буён жами 700 га яқин одам ҳалок бўлган, 100 мингдан ортиқ аҳоли ўз уйини тарк этишга мажбур бўлган.

Халқаро миқёсда «Катта еттилик» давлатлари Эронни ҳусийларни қуроллантиришни тўхтатишга чақирган. Ўз навбатида, Буюк Британия мудофаа операцияларида иштирок этаётган Саудия Арабистони самолётларига ҳавода ёқилғи қуйишда ёрдам беришини билдирган. БМТ воситачилигида 2022 йилда эришилган ўт очишни тўхтатиш келишувига қарамай, ҳусийларнинг сўнгги ҳужумлари минтақадаги вазиятни яна-да кескинлаштирди.