O‘zbekistondagi 17 ta oliy ta’lim muassasasi endi Oliy ta’lim, fan va innovatsiyalar vazirligi tizimida faoliyat yuritadi.

Prezidentning 2-oktyabrdagi qarori bilan Maktabgacha va maktab ta’limi vazirligi tizimidagi 14 ta pedagogik oliy ta’lim muassasasi, shuningdek Ixtisoslashtirilgan ta’lim muassasalari agentligi tizimidagi 3 ta oliygoh Oliy ta’lim, fan va innovatsiyalar vazirligi tasarrufiga o‘tkazildi.

Yangi tartib natijasida pedagog kadrlar tayyorlaydigan oliy ta’lim muassasalarining asosiy qismi oliy ta’lim sohasi uchun mas’ul bo‘lgan yagona vazirlik tizimiga o‘tkaziladi.

Bundan avval ham pedagogika oliygohlari faoliyatini qayta tashkil etish va ularni zamonaviy talablarga moslashtirish bo‘yicha qator o‘zgarishlar amalga oshirilgan.

Shuningdek, qarorga ko‘ra O‘zbekiston milliy pedagogika universitetiga Nizomiy Ganjaviy nomi berildi.

Endilikda pedagog kadrlar tayyorlash bo‘yicha muhim tayanch muassasalardan biri bo‘lgan mazkur universitet faoliyati yangi nom bilan davom etadi.

17 ta oliygohning bir tizimga o‘tkazilishi pedagogika ta’limi bilan maktab ta’limi o‘rtasidagi hamkorlikni yanada tizimlashtirish, pedagog kadrlarni tayyorlash jarayonini yagona yondashuv asosida muvofiqlashtirish va ta’lim sifatiga qo‘yiladigan talablarni birxillashtirish maqsadida amalga oshirilgan.

• Oliy ta'lim, fan va innovatsiyalar vazirligi
• Toshkent