Qashqadaryo viloyatining Kasbi tumanida 3 yoshli qiz o‘gay onasi tomonidan urilishi oqibatida vafot etdi. Bu haqda Bolalar ombudsmani xabar berdi.

Ma’lum qilinishicha, 26-sentabr kuni I.S. (1994-yilda tug‘ilgan ayol) turmush o‘rtog‘i N.A. bilan nizolashib, uning 2022-yilda tug‘ilgan voyaga yetmagan qizi O.Sh.ni urgan. Bola bosh qismidan og‘ir jarohat olgan va shu kunning o‘zida vafot etgan.

Holat yuzasidan 27-sentabr kuni Kasbi tumani IIB Tergov bo‘limi tomonidan Jinoyat kodeksining 126-moddasi 8-qismi “g” bandi bilan jinoyat ishi qo‘zg‘atilgan. I.S. Jinoyat-protsessual kodeksining 221-moddasiga asosan gumonlanuvchi sifatida ushlangan. Hozirda dastlabki tergov harakatlari olib borilmoqda.

Bolalar ombudsmani mazkur jinoyat ishi yuritilishi ustidan kuzatuvni davom ettirishini bildirgan. Qonunchilikka ko‘ra, ushbu jinoyat uchun 10 yildan 12 yilgacha ozodlikdan mahrum qilish jazosi belgilangan. Qo‘shimcha ma’lumotlar tergov natijalariga ko‘ra taqdim etilishi aytilgan.