Joriy yilning iyun oyida Jahon okeani yuzasi harorati kuzatuvlar tarixidagi iyun oylari uchun eng yuqori darajaga yetdi. Bu haqda Yevropaning Copernicus Marine monitoring xizmati ma’lum qildi. Hisobotga ko‘ra, okean yuzasining o‘rtacha harorati 20,94 darajani tashkil etib, 2023 va 2024-yillarda qayd etilgan rekord ko‘rsatkichlardan ham oshgan. Natijada 2026-yilning dastlabki olti oyi okeanlar uchun kuzatuvlar tarixidagi eng issiq davrlardan biri sifatida qayd etildi.

Mutaxassislar ta’kidlashicha, dengizdagi issiqlik to‘lqinlari yil davomida uzluksiz kengayib, iyun oyi yakuniga kelib Jahon okeanining qariyb 82 foizini qamrab olgan. Eng yuqori haroratlar O‘rta yer dengizi, Shimoliy Atlantika okeanining markaziy qismi hamda Tinch okeanining ekvatorial hududlarida kuzatilgan. Okeanograflarga ko‘ra, Jahon okeani hozirda doimiy issiqlik bosimi ostida qolmoqda. Bu holat dengiz ekotizimlari, iqlim jarayonlari va ob-havo o‘zgarishlariga jiddiy ta’sir ko‘rsatishi mumkin. Tadqiqotchilar rekord darajadagi isishni asosan El-Ninyo iqlim hodisasi bilan bog‘lamoqda. Ushbu tabiiy jarayon Tinch okeanining markaziy va sharqiy qismida suv haroratining me’yordan yuqori bo‘lishi bilan tavsiflanadi va global iqlimga sezilarli ta’sir ko‘rsatadi.