Buxoroda aholiga ko‘rsatilayotgan transport xizmatlari sifatini yaxshilash maqsadida zamonaviy harakat tarkiblari (yangi avtobuslarni) olib kelish ishlari davom etmoqda. Xususan, “Bux Pit Stop” korxonasi tomonidan yana 25 ta zamonaviy avtobus olib kelindi. Bu haqida viloyat hokimligi matbuot xizmati xabar berdi. Qayd etilishicha, ushbu avtobuslar ham yo‘lovchilar uchun qator qulayliklarga ega. Ular “Yevro-5” standarti talablariga to‘liq javob beradi hamda tabiiy siqilgan gazda harakatlanadi. Har biri 30 nafar yo‘lovchini qulay sharoitlarda manziliga yetkazishga mo‘ljallangan ushbu avtobuslar past polli bo‘lib, nogironligi bo‘lgan shaxslarning harakatlanishi uchun maxsus pandus uskunalari va alohida o‘rindiqlar bilan jihozlangan. Yo‘l haqi to‘lovlarini elektron tarzda ham amalga oshirish uchun “ATTO” tizimi o‘rnatilgan. Avtobus saloni to‘liq kuzatuv kameralari bilan ta’minlangan. Shuningdek, avtobus ichidagi yo‘lovchilarni sonini aniqlash tizimi yo‘lga qo‘yilgan.

Yuqori darajadagi qulayliklarga ega bo‘lgan zamonaviy avtobuslar jamoat transporti yetib bormagan nuqtalarni o‘zaro bog‘lash uchun xizmat qilib, tender natijalariga ko‘ra 13-sonli “Madaniyat” bosh bekati – “To‘qimachi” bosh bekati va 15- sonli “Markaziy dehqon bozori” bosh bekati – “G‘urbincha” yo‘nalishlarida brutto asosida qatnovlarni amalga oshirib, yo‘lovchilarga transport xizmati ko‘rsatishni boshlaydi.

Mart oyi yakuniga qadar Buxoroga yana 60 ta ana shunday avtobuslar olib kelinishi rejalashtirilgan. Xususan, “Yutong” kompaniyasi bilan hamkorlik doirasida shahar tipiga moslashtirilgan katta hajmdagi 12 dona avtobus xarid qilish bo‘yicha shartnoma imzolangan. Hozirda bu avtobuslar ham yetkazib berish jarayonida. Umuman, yil yakunigacha yangi olib kelinayotgan jamoat transportlari soni 100 tadan oshiriladi. Ushbu avobuslarning barchasi yo‘nalishlarda brutto-shartnoma asosida aholiga xizmat ko‘rsatadi.

• Avtobus
• Buxoro
• Jamoat transporti