Xabardor.uz’ning “Interview” dasturining navbatdagi mehmoni mashhur bloger – Instagram tarmog‘ida dili.me taxallusi bilan mashhur “kotta bola” – Dilshod Nazarov.

– Assalomu alaykum, Dilshodjon. Qimmatli vaqtingizni ayamay tashrif buyurganiz uchun katta rahmat.

Hozirgi kunda sizni ijtimoiy tarmoqlar orqali tanimagan odam kam bo‘lsa kerak. Shunday bo‘lsada dasturimizning birinchi an’anaviy savoli bilan murojaat qilaman: “dili.me” kim va oilangiz haqida ham qisqacha to‘xtalib o‘tsangiz...

– Mening ismi-sharifim – Dilshod Nazarov. Oilada 6 kishimiz. Ota-onam, opam, men, singlim va ukam. Oliy ta’limda tahsil olmaganman, o‘rta maktabni bitirganman. Hozirda blogerlik bilan shug‘ullanaman.

– Nima uchun aynan shu sohadasiz? Yoki blogerlik (vaynerlik), ijtimoiy tarmoqlarda tanilish ortidan ham daromad qilish mumkinligi uchunmi?

– To‘g‘risini aytsam, bu sohada daromad borligi haqida bilmaganman. Bu sohaga kirib kelishimdan maqsad esa – men san’atni yaxshi ko‘raman. Estrada va sirk kollejining aktyorlik mahorati yo‘nalishida tahsil olganman. Har doim xayolimda qachondir baribir aktyor bo‘laman, degan fikr bo‘lardi. Oradan 2-3 yil o‘tib, karantin tufayli tasodifan kichik videolar qilib ijtimoiy tarmoqlarga joyladik. Shundan so‘ng mashhurlikka erisha boshladim.

– Bundan avval bergan intervyularingizdan birida “men hozirgi kundagi “topovыy” blogerlarga havas qilib bu sohaga kirib kelganman” degan ekansiz. Xo‘sh, ular bilan taqqoslaganda hozir sizning o‘rningiz qayerda?

– Albatta ulardan keyingi o‘rinda. Chunki ular faoliyatlarini mendan ancha avval boshlashgan. Menimcha, bu savolingizga javobni obunachilardan so‘rash kerak.

– Hali ham ijodingiz davomida bosimlar yoki tayyorlagan vaynlaringiz kimgadir tegib ketib, akkauntingizdan shu videoni olib tashlashingizni so‘rash holatlari bo‘lib turadimi?

– Bunday holatlar ko‘p bo‘ladi. Bilasizmi, videolarimiz asosan aktual mavzularni qamrab oladi yoki xalqimiz orasidagi jaydari gaplar va internet olamidagi mashhur frazalar asosida tayyorlanadi. Balki shu mavzular kimgadir “tegib” ketsa kerak.

– 3 yil oliy ta’limga o‘qishga topshirib kira olmay, hozirgi kunda hayotda o‘z o‘rningizni topib oldingiz deyish mumkin. To‘g‘rimi? Ana shunday o‘qishga kira olmay, tushkunlikka tushib yurgan tengdoshlaringiz uchun nima maslahat yoki motivasiya bera olasiz?

– Yoshlarga aytadigan talaygina gaplarim bor. Har yili OTM test javoblari chiqqandan keyin video tayyorlaymiz. O‘qishga kira olmadingizmi, siqilmang. Kelajakda sizlarni buyuk ishlar kutmoqda. Men ham uch yil oliy ta’limga imtihon topshirib, kira olmaganman. Hamma narsada bir hikmat bor.

– Qachondir – kun kelib siz hozir shug‘ullanayotgan sohangiz yakuniga yetishi va boshqa sferada tirikchilik qilishingizga to‘g‘ri kelishi haqida o‘ylaysizmi?

– Biznes bilan shug‘ullansam kerak. Serial va kino sohasida ham omadimni sinab ko‘raman.

– Maroqli suhbat uchun rahmat.

Olimjon Hasanov suhbatlashdi

• Instagram
• Madaniyat
• Vayner
• qiziqarli