Toshkent shahrida 1 kilogrammdan ortiq gashishni 26 ming AQSH dollariga sotishga uringan, avval ham giyohvandlik bilan bog‘liq jinoyat uchun sudlangan shaxs qo‘lga olindi. Bu haqda Davlat xavfsizlik xizmati ma’lum qildi.

DXXning Qoraqalpog‘iston Respublikasi bo‘yicha boshqarmasi, Bojxona va Ichki ishlar organlari xodimlari hamkorligida o‘tkazilgan tezkor tadbir davomida qo‘shni davlatdan olib kirilgan katta miqdordagi narkotik modda Toshkentda musodara qilingan.

Aniqlanishicha, 1988-yilda tug‘ilgan, Denov shahrida yashovchi, muqaddam giyohvandlik vositalari bilan bog‘liq jinoyat uchun sudlangan shaxs Yakkasaroy tumanidagi mehmonxonalardan birida 1 kilogramm 185 gramm gashishni 26 ming dollarga sotishga kelishgan.

U kelishilgan pulning 21 ming dollarini olayotgan vaqtida ashyoviy dalillar bilan ushlandi.

Shuningdek, narkotik moddani Surxondaryodan Toshkentga olib kelgan Cobalt avtomobili haydovchisi ham qo‘lga olindi. 1987-yilda tug‘ilgan ushbu shaxs ham muqaddam o‘g‘rilik bilan bog‘liq jinoyat uchun sudlangan.

Holat yuzasidan jinoyat ishi qo‘zg‘atilgan. Hozirda tergov harakatlari olib borilmoqda.