Parijdagi Eyfel minorasida hindu diniy delegatsiyasi tashrifi vaqtida ayol xodimlar ish joylarini tark etishga majburlangani haqidagi xabarlar yuzasidan tekshiruv boshlandi. Bu haqda Reuters xabar berdi.

Hodisa 6-sentabr kuni BAPS nomi bilan tanilgan hindu diniy tashkilotiga aloqador qariyb 100 kishilik delegatsiyaning Eyfel minorasiga yopiq tashrifi vaqtida sodir bo‘lgani aytilmoqda.

Kasaba uyushmasi vakili Dian Davuanning Reuters’ga ma’lum qilishicha, delegatsiya o‘tib ketayotgan paytda ayol xodimlardan ish joylarini tark etish va ularning o‘rniga erkak hamkasblarini qo‘yish so‘ralgan. Bu holat xodimlar orasida norozilikka sabab bo‘lgan.

7-sentabr kuni xodimlar voqeani muhokama qilish va rahbariyat bilan uchrashish uchun yig‘ilgan. Shu sababli Eyfel minorasi odatdagidan kechroq ochilgan. Kirish qismida kechikish “operatsion sabablar” bilan izohlangan.

Davuanning so‘zlariga ko‘ra, minora ma’muriyati xodimlardan yuz bergan holat uchun uzr so‘ragan.

Parij meri Emmanuel Greguar voqea yuzasidan tezkor tekshiruv o‘tkazilishini ma’lum qilgan. U xodimlarning noroziligi asosli ekanini ta’kidlab, hodisaga olib kelgan barcha holatlar aniqlanishi kerakligini bildirgan.

BAPS tashkiloti ham voqea yuzasidan bayonot berib, delegatsiya tashrifi tashrif buyuruvchilarga xalaqit bermaslik maqsadida Eyfel minorasi ochilishi bilan bir vaqtga rejalashtirilganini ma’lum qilgan. Tashkilot vakillari o‘zlariga ma’lum ma’lumotlarga ko‘ra, hech kimning minoraga kirishiga to‘sqinlik qilinmaganini bildirgan. Shu bilan birga, yuzaga kelgan noqulaylik uchun uzr so‘ragan.

Fransiya Milliy assambleyasi raisi Yael Braun-Pive ham holatga munosabat bildirgan. U Fransiyada ayollar jamoat hayotida erkaklar bilan teng huquqda ishtirok etishini ta’kidlab, boshqa madaniyat va din vakillarini qabul qilish mamlakatning asosiy qadriyatlaridan voz kechishni anglatmasligini qayd etgan.

Ma’lum qilinishicha, BAPS delegatsiyasi Fransiyaga Parij yaqinida hindu ibodatxonasi ochilishi munosabati bilan o‘tkazilgan tadbirlarda ishtirok etish uchun kelgan.