G‘azo sektorida oktyabr oyining boshida o‘t ochishni to‘xtatish e’lon qilingandan so‘ng kamida 67 nafar bola halok bo‘lgan, yana o‘nlab bolalar yaralangan. Bu haqda BMTning Bolalar fondi (YUNISEF) rasmiy vakili Rikardo Pires ma’lum qildi.

"Kecha G‘azo shahrida 7 bola o‘ldirilgani haqida xabarlar oldik. 11-oktyabrdan boshlab G‘azo sektorida kamida 67 bola halok bo‘ldi, o‘nlab bolalar yaralandi. Bu shuni anglatadiki, sulhdan keyin kuniga 2 bola halok bo‘lmoqda", — dedi u Jenevada o‘tkazilgan brifingda.

Rikardo Pires, shuningdek, yaqinlashayotgan sovuq ham bolalar sog‘lig‘i uchun xavf tug‘dirishi, ularning ko‘pi hanuzgacha chodirlar yoki vaqtinchalik boshpanalarda yashayotganligi, hatto, oilalarda yopinchiq ham yetishmasligini ta’kidlagan. Uning aytishicha, bu holat nafas yo‘llari infeksiyalari ko‘payishiga  olib keladi. “4000 ga yaqin bola hali ham shoshilinch tibbiy evakuatsiyaga muhtoj”, — deya qo‘shimcha qilgan YUNISEF rasmiy vakili.

10-oktyabrda sulh e’lon qilingandan keyin Isroil Mudofaa Armiyasi (IDF) G‘azo sektoriga bir necha bor zarbalar bergan. IDF matbuot xizmati bu choralar o‘t ochishni to‘xtatish rejimini Falastin tomoni buzganligi bilan izohlanganini bildirgan.

G‘azo sektori rasmiylarining statistik ma’lumotlariga ko‘ra, sulh kuchga kirganidan buyon isroillik harbiylar o‘t ochishni to‘xtatish rejimini 280 martadan ortiq buzgan. Bu harakatlar natijasida 312 kishi halok bo‘lgan, yana 760 kishi jarohatlangan.

• Bolalar
• Falastin
• Isroil