Endilikda hokimliklar tomonidan qabul qilingan noqonuniy normativ-huquqiy hujjatlar fuqarolar tomonidan ma’muriy sudda bevosita nizolanishi mumkin.

Bunday hujjatlar muayyan hududdagi ko‘plab fuqarolarning huquq va manfaatlariga ta’sir qilishi mumkin. Yangi tartib fuqarolarga ularning huquqlarini buzuvchi normativ hujjatlar ustidan sud orqali himoyalanish imkoniyatini kengaytiradi.

Davlat organlari qo‘llaydigan choralar mutanosib bo‘lishi kerak

Davlat organlari fuqaro yoki tadbirkorga nisbatan ta’sir chorasi qo‘llaganda, uning qonuniy maqsadga mosligi va mutanosibligiga rioya qilishi kerak.

Ma’muriy sudlarga endilikda davlat organi o‘ziga berilgan bir nechta qarordan birini tanlash vakolatidan qonuniy va asosli foydalanganini ham tekshirish vakolati beriladi. Sud qo‘llangan chora zarur chegaradan oshib ketmaganiga ham baho beradi.

Sud qarorini bajarmagan mansabdor javobgarlikka tortiladi

Ma’muriy sud qarorini bajarmagan mansabdor shaxsga nisbatan dastlab jarima qo‘llanadi. Agar sud qarori ijro etilmasa, qonunda nazarda tutilgan choralarni ko‘rish uchun prokurorga xabar beriladi.

Yangi tartibning asosiy maqsadi — sud qarorlarining ijrosini ta’minlash va fuqaroning sud orqali tan olingan huquqi amalda tiklanishiga erishishdir.