Yevropa Ittifoqiga a’zo davlatlar rossiyalik milliarderlar USM Holdings asoschisi Alisher Usmonov hamda Alfa-grupp hammuassisi Mixail Fridmanni sanksiyalar ro‘yxatidan chiqarish bo‘yicha kelishuvga erishdi.

Ma’lumotlarga ko‘ra, Rossiyaga qarshi sanksiyalar ro‘yxatida qariyb 3 ming nafar jismoniy va yuridik shaxs mavjud bo‘lib, ilgari ushbu cheklovlar har 6 oyda barcha 27 davlatning roziligi bilan uzaytirib kelingan. Yangi kelishuvga ko‘ra, sanksiyalar 2029 yil 22 sentyabrgacha amal qiladi.

Usmonov va Fridmanga nisbatan sanksiyalarni bekor qilish masalasi so‘nggi haftalarda YeI davlatlari o‘rtasida muhokamalarga sabab bo‘lgandi. Avval Slovakiya, keyinroq Fransiya Usmonovni sanksiyalar ro‘yxatidan chiqarishni talab qilgan bo‘lsa, Lyuksemburg Fridmanga nisbatan cheklovlarni bekor qilishni so‘ragan.

Fransiya o‘z talabini milliy xavfsizlik masalalari bilan izohlagan. Parijning Usmonov bo‘yicha pozitsiyasi Ozarbayjon bilan mahbuslarni ozod qilish bo‘yicha muzokaralar bilan bog‘liq bo‘lgan. Shuningdek, Usmonovni sanksiyalar ro‘yxatidan chiqarishni Turkiya va O‘zbekiston ham ilgari qo‘llab-quvvatlagan. Fridman masalasida esa Lyuksemburgning pozitsiyasi biznesmenning mamlakat hukumatiga qarshi kiritgan yirik da’vosi bilan bog‘langan.

Dastlab Latviya Usmonov va Fridmanga nisbatan sanksiyalarni bekor qilishga qarshi chiqqan Yevropa Ittifoqidagi yagona davlat bo‘lgan. Biroq keyinchalik Riga o‘z vetosini qaytarib olib, konstruktiv betaraflik pozitsiyasini tanlagan. Shundan so‘ng YeI Kengashi sanksiyalar muddati uzaytirilganini rasman ma’lum qildi.

Usmonov va Fridmanga qarshi sanksiyalar Yevropa Ittifoqi tomonidan 2022 yilda, Rossiyaning Ukrainaga qarshi harakatlari boshlanganidan keyin joriy etilgan edi.