Turkiyaning Istanbul, Yalova va Kojaeli viloyatlarida kuchli yomg‘ir va shamol kutilayotgani sababli u yerda yashayotgan yoki vaqtincha bo‘lib turgan O‘zbekiston fuqarolari ogohlantirildi. Bu haqda O‘zbekistonning Istanbul shahridagi Bosh konsulxonasi ma’lum qildi.

Konsullik ma’lumotiga ko‘ra, noqulay ob-havo suv toshqinlari, yo‘llarda harakatlanishning qiyinlashishi va boshqa favqulodda holatlarga sabab bo‘lishi mumkin. Shu bois fuqarolarga zarurat bo‘lmasa, uzoq masofalarga safar qilmaslik, pastqam hududlar, yerosti yo‘llari va tunnellardan uzoqroq bo‘lish tavsiya etildi.

Shuningdek, dengiz sohillari, daraxtlar, elektr uzatish tarmoqlari va mustahkam o‘rnatilmagan konstruksiyalar yaqinida ehtiyotkorlikni oshirish, avtomobil boshqarishda tezlikni kamaytirish hamda xavfsiz masofani saqlash so‘ralgan. Fuqarolarga Turkiya vakolatli idoralarining rasmiy ogohlantirish va tavsiyalariga amal qilish tavsiya etildi.

Bosh konsulxona fuqarolarni o‘z xavfsizligi va yaqinlarining salomatligiga alohida e’tibor qaratishga chaqirdi.

Avvalroq Bosh konsulxona ma’lumotiga ko‘ra, Turkiyada qariyb 130 ming nafar O‘zbekiston fuqarosi istiqomat qilgan. Ularning 80 ming nafari qonuniy, 50 mingga yaqini esa noqonuniy ravishda mamlakatda yashagan.

Ma’lumot uchun, Istanbulda kuchli yomg‘ir va bo‘ron oqibatida suv toshqinlari yuz bergani, ikki kishi halok bo‘lgani va ko‘plab uylar hamda ish joylariga zarar yetgani xabar qilingan. 15-oktyabr kuni shahardagi davlat va xususiy ta’lim muassasalarida darslar bekor qilingan.