Toshkent shahrida 66-sonli avtobus salonining sanitariya holati talabga javob bermagani sababli uch nafar navbatchi mexanikning oylik ish haqidan 10 foiz miqdorida jarima undirildi. Bu haqda “Toshshahartransxizmat” AJ xabar berdi.

Ma’lum qilinishicha, 13-oktyabr kuni Telegram’da “12-avtobus saroyi” filialiga qarashli, “Yo‘ldosh 17-mavzesi – Toshkent vokzali” yo‘nalishida harakatlanuvchi 205-saroy raqamli avtobus salonining sanitariya holati tanqid qilingan post e’lon qilingan.

Murojaat o‘rganilgach, avtobus shu kunning o‘zida yo‘nalishdan qaytgach, yuvish shoxobchasida to‘liq yuvilgan. Salonning ichki qismi ham maxsus tozalash vositalari yordamida sanitariya talablariga muvofiq tozalangan.

Aniqlangan kamchiliklar yuzasidan navbatchi mexaniklar X. D., R. V. va O‘. A. bilan tushuntirish ishlari olib borilib, ulardan tushuntirish xatlari olingan. Shundan so‘ng ularga oylik ish haqining 10 foizi miqdorida jarima jazosi qo‘llangan. “Toshshahartransxizmat” AJ bunday holatlarning takrorlanishiga yo‘l qo‘ymaslik va avtobuslarning sanitariya holatini nazorat qilish bo‘yicha choralar ko‘rilishini bildirgan. “12-avtobus saroyi” filiali yuzaga kelgan noqulayliklar uchun yo‘lovchilardan uzr so‘ragan.