Ispaniya Kubogi yarim final bosqichida “Real Madrid” va “Real Sosedad” o‘rtasidagi javob uchrashuvi Madridning “Santyago Bernabeu” stadionida bo‘lib o‘tdi. Dramatik tarzda kechgan bahsga Ryudigerning 115-daqiqada boshi bilan urilgan goli mantiqiy yakun yasadi. Madrid jamoasi umumiy 5:4 hisobida g‘alaba qozondi va finalga yo‘l oldi.

Bugun yarim finalning ikkinchi juftligida Madridning boshqa bir jamoasi “Atletiko” o‘z uyida “Barselona”ni qabul qiladi. Jamoalar o‘rtasidagi dastlabki o‘yin 25-fevral kuni 4:4 hisobidagi durang bilan yakunlangan edi. Javob o‘yin “Metropolitano” stadionida bo‘lishini inobatga olsak, safarda durrang qayd etgan mezbonlar uchun yaxshi imkoniyat bo‘lishi mumkin. Ammo, Kataloniya jamoasi ham hozirda barcha musobaqalarda 20 o‘yindan iborat mag‘lubiyatsiz seriyaga ega bo‘lib, 2025-yilda Yevropaning Top-5 ligalarida yutqazmagan yagona jamoa bo‘lib turibdi.

Agar “Barselona” bugungi o‘yinda g‘alaba qozonsa finalda ularni “qirollik jamoasi” kutib turibdi. Va futbol muxlislari mavsumda yana bir “El Klasiko”ning guvohiga aylanishadi.

• Atletiko Madrid
• Barselona
• Ispaniya
• Real