Surxondaryo viloyati va Toshkent shahrida o‘tkazilgan tezkor tadbirlar davomida 2,5 kilogrammdan ortiq opiy hamda qariyb 3 kilogramm ko‘knor boshoqlari musodara qilindi. Bu haqda Davlat xavfsizlik xizmati xabar berdi. Ma’lum qilinishicha, Termiz tumanidagi O‘zbekiston—Afg‘oniston davlat chegarasi orqali noma’lum shaxslar tashlab ketgan umumiy og‘irligi 2 kg 562 gramm bo‘lgan opiy giyohvandlik vositasi aniqlanib, olib qo‘yilgan.

Mazkur holat yuzasidan jinoyat ishi qo‘zg‘atilib, giyohvandlik vositasining egalarini aniqlash bo‘yicha tezkor-qidiruv tadbirlari davom ettirilmoqda. Yana bir tezkor tadbirda esa Toshkent shahrining Chilonzor tumanida yashovchi 1974-yilda tug‘ilgan fuqaroning xonadonidan 2 kg 930 gramm ko‘knor boshoqlari topilib, protsessual tartibda musodara qilingan. Hozirda ushbu holat yuzasidan dastlabki surishtiruv ishlari olib borilmoqda.