Marokashda so‘nggi bir haftada “Z avlod” deb nom olgan keng ko‘lamli norozilik namoyishlari bo‘lib o‘tmoqda. Aksiya ishtirokchilari korrupsiya, ijtimoiy tengsizlik va shifoxonalardagi og‘ir sharoitlardan norozi, shu bilan birga, stadionlarga katta mablag‘ sarflanayotganini tanqid qilmoqda.

Agadir yaqinidagi Laklia shahrida politsiya uchastkasiga hujum chog‘ida uch kishi halok bo‘ldi, 300 kishi yaralandi va 400 dan ortiq odam hibsga olindi. Tartibsizliklar vaqtida o‘nlab binolar, bank va do‘konlar talon-toroj qilinib, yuzlab mashinalar yoqib yuborildi.

Norozilikka Agadirdagi shifoxonada sakkiz chaqaloqning o‘limi turtki bo‘lgan. Aksiyalarni Discord’dagi “GenZ 212” guruhi muvofiqlashtirmoqda. Ular zo‘ravonlikni rad etishga chaqirishmoqda.

Bosh vazir Aziz Axanush hukumat muammolarni hal qilish uchun muloqotga tayyorligini bildirdi. Shu bilan birga, namoyishchilar uning va hukumatning iste’fosini talab qilmoqda.

• Aksiya