Toshkent shahar hokimligi huzuridagi Jamoatchilik kengashi Vazirlar Mahkamasidan Oliy Majlis Qonunchilik palatasi binosi yaqinida Milliy drama teatri qurilishini ekologik ekspertizadan o‘tkazishni so‘rab, murojaat yo‘lladi.

“Ommaviy axborot vositalarida 2021-yilning noyabrida Oliy Majlis qonunchilik palatasi yonida joylashgan Milliy bog‘ hududidagi ko‘l quritilib, o‘rnida Milliy drama teatri qurilishi borasida xabarlar tarqaldi. Toshkent shahar hokimligi huzuridagi Jamoatchilik kengashi Milliy bog‘dagi ko‘l o‘rnida Milliy akademik drama teatri yangi binosini qurish rejasidan o‘z xavotirini bildiradi. 

Ma’lum bo‘lishicha, loyiha qonunchilikda o‘rnatilgan tartibda ekologik ekspertizadan o‘tkazilmasdan amalga oshirilishi rejalashtirilgan. Yuqoridagilarga asoslanib, bu masalani ekologik ekspertiza xulosalarini inobatga olgan holda hal qilinishi maqsadga muvofiq bo‘lar edi”, – deyiladi Vazirlar Mahkamasi va Toshkent shahar hokimligiga yo‘llangan murojaatda.

Avvalroq, Milliy bog‘ hududida Navoiy nomidagi ijod maktabi va adabiyot muzeyining yangi binosi qurilishi boshlangan. 

Bundan tashqari yangi Milliy drama teatr binosi, mashhur yaponiyalik arxitektor Tadao Ando loyihasi asosida Davlat san’at muzeyining namoyishlari kompleksi, yosh olimlar, yoshlar va kitob ixlosmandlariga xizmat ko‘rsatishga mo‘ljallangan, ilm-fan va san’atning turli sohalariga oid bosma hamda elektron davriy nashrlarning ulkan salohiyatiga ega bo‘lgan, shuningdek, 1,5 mln dona kitoblar fondini o‘z ichiga olgan ulkan kutubxona binosi qurilishi rejalashtirilgan.

• Milliy bog‘
• Senat