Hindistonning Maxasamund tumanida 4-oktyabrga o‘tar kechasi qoplon uyga kirib, bir oilaning olti nafar a’zosiga hujum qildi. Hodisa Bagbaxara o‘rmon hududiga qarashli Jxitki qishlog‘ida soat 01:30 lar atrofida sodir bo‘lgan. Jabrlanganlarning uch nafari og‘ir jarohat olgan. Bu haqda “The Times of India” xabar berdi.

Qayd etilishicha, 55 yoshli Uttaribay Yadav hojatxonaga chiqish uchun uydan tashqariga chiqqanida qoplon unga tashlangan. Ayolning qichqirig‘ini eshit gan oila a’zolari yordamga chiqqan, biroq hayvon uyga kirib, ularga birin-ketin hujum qilgan. Natijada Sarju Yadav (60 yosh ), Uttaribay Yadav, Janakram Yadav, Manish Yadav (18 yosh), Tushar Yadav (15 yosh) va Sunita Yadav (32 yosh) jarohatlangan.

Vahima vaqtida oila a’zolari uydan chiqib, qoplonni xonalardan biriga qamab qo‘yishga muvaffaq bo‘lgan. Shundan so‘ng politsiya va o‘rmon xodimlari voqea joyini o‘rab olgan. Nava Raypurdagi “Jungle Safari” bog‘idan kelgan 10 kishilik qutqaruv guruhi bir necha soatlik operatsiyadan so‘ng hayvonni qafasga tushirgan. Mutasaddilar qoplon xavfsiz hududga ko‘chirilishini bildirgan.

Jarohatlanganlarning barchasi dastlab Bagbaxara jamoat salomatligi markaziga, keyin Maxasamund tibbiyot kolleji shifoxonasiga olib borilgan. Ulardan uch nafari keyinchalik Raypur shahriga yuborilgan.

Hodisadan bir kun avval Pandripani yaqinidagi Karipat o‘rmonida o‘tin terayotgan kishiga ham qoplon hujum qilgan. O‘rmon mutasaddilari ushbu hujumlarda aynan bir qoplon qatnashgan-qatnashmaganini hozircha aniqlamagan. Ketma-ket hujumlar Jxitki, Pandripani va o‘rmonlarga tutash boshqa q ishloqlarda xavotir uyg‘otgan.