Ekologiya, atrof-muhitni muhofaza qilish va iqlim o‘zgarishi vazirligi tomonidan respublikada noyabr oyi “Brakonerlikka qarshi kurashish” oyi deb belgilandi.

Maqsad — O‘zbekiston Respublikasining “Ekologik nazorat to‘g‘risida”, “Tabiatni muhofaza qilish to‘g‘risida” va “Hayvonot dunyosini muhofaza qilish va undan foydalanish to‘g‘risida”gi qonunlari ijrosini ta’minlash, brakonerlikka qarshi qat’iy choralar ko‘rishdir.

Oy davomida barcha muhofaza etiladigan tabiiy hududlarda, shuningdek, respublikaning cho‘l, tog‘li hududlarida hamda tabiiy suv havzalarida noqonuniy ravishda o‘simlik va hayvonot dunyosidan foydalanish, jumladan, noqonuniy baliq ovlash bo‘yicha tegishli tashkilotlar bilan hamkorlikda ekologik nazorat tartibida reyd tadbirlari amalga oshiriladi.

Shuningdek, har bir hududda reyd tadbirlari o‘tkazish bo‘yicha tezkor guruhlar shakllantirilib, hayvonot va o‘simlik dunyosi obyektlaridan foydalanish, ov qilish va baliq ovlash qoidalariga rioya etilishi bo‘yicha targ‘ibot va profilaktika ishlari olib boriladi.

“Agar brakonerlik holatlariga guvoh bo‘lsangiz, bu haqda Ekologiya vazirligining (71) 207-11-07, (71) 207-11-08 telefon raqamlari, 1157, 1207 qisqa raqamlari yoki @ecogovuz_bot orqali xabar bering”, – deyiladi vazirlik xabarida.

• Ekologiya
• Qaror
• Vazirlik