Ijtimoiy tarmoqlarda Rio olimpiadasi gʻolibi Fazliddin Gʻoibnazarovning qushlar ovlangani aks etgan foto va videolavhalar tarqalgan edi.

Mazkur holat boʻyicha Davlat ekologiya qoʻmitasi oʻrganishlar olib borgan.

Unga koʻra, 2022-yilning 30-dekabr kuni Toshkent viloyati Bekobod tumani Sirdaryo daryosida fuqaro X.U tomonidan qushlar ovlangani va oʻljalar bilan bevosita boshqa fuqarolar bilan birgalikda sportchi F. Gaibnazarov ham foto va videotasvirga tushganligi oʻz tasdigʻini topgan.

Keltirilishicha, ovni amalga oshirgan fuqaro X.U ning ov qilishga tegishli hujjatlari mavjudligi, u ovchilik jamiyatidan roʻyxatdan oʻtganligi aniqlangan.

Biroq, u ov jarayonida belgilangan meʼyorlarga amal qilmagan holda ov qilish qoidalarini qoʻpol tarzda buzganligi va bu bilan tabiatga zarar yetkazganligi maʼlum boʻlgan.

Oʻzbekiston Respublikasi Maʼmuriy javobgarlik toʻgʻrisidagi kodeksining 90-moddasiga asosan, huquqbuzarga nisbatan jarima va hayvonot olamiga yetkazilgan zarar miqdori hisoblanib, ov qurollari Toshkent viloyati Boʻka tumani IIBga belgilangan tartibda topshirilgan.

Maʼlum qilinishicha, yuqoridagi holat yuzasidan barcha ishtirokchilardan bunday holat boshqa takrorlanmasligi toʻgʻrisida tushuntirish xatlari olinib, profilaktik suhbat oʻtkazilgan.

• Davlat ekologiya qo'mitasi
• MJtK