Portugaliyalik futbol yulduzi Krishtianu Ronaldu to‘p surayotgan Saudiya Arabistonining “Al-Nasr” klubi 2-noyabr kuni Toshkentda “Paxtakor” jamoasiga qarshi maydonga tushadi. Uchrashuvda ishtirok etish uchun Ronalduning O‘zbekistonga kelishi kutilmoqda. Bu haqda FIFA sobiq agenti Ravshan Salimov o‘zining Telegram-kanalida ma’lum qildi.

Salimovning yozishicha, u “Al-Nasr” menejerlari bilan suhbatlashgan. Uning ta’kidlashicha, Ronalduning Toshkentga kelishi bo‘yicha yakuniy qarorni jamoa bosh murabbiyi qabul qiladi.

“Al Nassr” rahbariyati olib borayotgan tashkiliy ishlarga qaraganda Ronaldu Toshkentga keladi”, deb yozgan Salimov.

Uchrashuv Osiyo Chempionlar ligasi Elit musobaqasining to‘rtinchi turi doirasida o‘tkaziladi. Keltirilgan ma’lumotlarga ko‘ra, musobaqaning dastlabki ikki turidan so‘ng “Paxtakor” ikki ochko bilan to‘qqizinchi, “Al-Nasr” esa bir g‘alaba va bir mag‘lubiyat bilan sakkizinchi o‘rinda bormoqda.

Hozircha Ronalduning Toshkentga kelishi rasman tasdiqlanmagan. Uning safarda ishtirok etishi bo‘yicha yakuniy qaror jamoa bosh murabbiyiga bog‘liq.