Prezident Shavkat Mirziyoyev Xo‘jaobod tumanidagi texnoparkda bo‘lib, Xitoy investitsiyalari asosida tashkil etilgan zamonaviy “aqlli” suv hisoblagichlar ishlab chiqarish korxonasi faoliyati bilan tanishdi.

Andijon viloyatida hududning kichikligi va aholi zichligi hisobga olinib, har bir qarich yerdan samarali foydalanish hamda adirliklarni o‘zlashtirish orqali yangi sanoat maydonlarini tashkil etishga alohida e’tibor qaratilmoqda. Xususan, 300 million dollarlik xorijiy investitsiyalar evaziga barpo etilgan “Andijon texnoparki” shunday yirik loyihalardan biri bo‘lib, 100 gektar maydonda 51 ta sanoat korxonasini joylashtirish rejalashtirilgan. Sanoat zonasi to‘liq ishga tushgach, 3 mingta ish o‘rni yaratilib, yiliga 200 million dollarlik mahsulot ishlab chiqariladi va budjetga 160 milliard so‘m tushum ta’minlanadi.

Xitoyning “Sanchuan” kompaniyasi tomonidan qiymati 25 million dollar bo‘lgan loyiha to‘liq xorijiy investitsiyalar hisobiga amalga oshirildi. Korxona yiliga 15 turdagi 1 million dona “aqlli” suv hisoblagich ishlab chiqarish quvvatiga ega.

 

Korxonadagi jarayonlarning 80 foizi robotlashtirilgan. “Huawei” kompaniyasi bilan hamkorlikda 5G texnologiyasi asosida yaratilayotgan bu hisoblagichlar suv sarfi, sifati, qurilmalarning texnik holati hamda balansni onlayn kuzatish imkonini beradiQurilmalar suv to‘planishining oldini oluvchi maxsus konstruksiya va sovuqqa chidamli korpus bilan jihozlangan.

 

Korxonada dual ta’lim dasturi yo‘lga qo‘yilgan bo‘lib, butlovchi qismlar ishlab chiqarishni kengaytirish orqali mahalliylashtirish darajasini 2030-yilga qadar 70 foizga yetkazish rejalashtirilgan.