Oxirgi payt dunyoda maymunchechak kasalligi bo‘yicha vaziyat tahlikali holatga kelayotganligi to‘g‘risida xabarlar tarqalmoqda. Ushbu kasallikka qarshi O‘zbekistonda qanday choralar ko‘rilmoqda?

Bu borada Sanepidqo‘mita boshqarma boshlig‘i Rustamjon Ikramovning ma’lum qilishicha, O‘zbekistonda kasallikka chalinganlikda gumon qilinadigan holatlarda laboratoriya tashxislanishini o‘tkazish uchun bojxonalardagi va virusologiya ilmiy tekshirish institutidagi virusologiya mutaxassislari qayta tayyorgarlikdan o‘tkazilgan.

Shuningdek, maymun chechagi kasalligini tashxislash uchun zarur bo‘ladigan diagnostika va test sistemalarini olib kelish yuzasidan ishlar yo‘lga qo‘yilgan.

“Bizda 2023-yilda berilgan test sistemasi ham mavjud. Undan foydalanish yuzasidan ma’lum ishlarni amalga oshiryapmiz.

Ya’ni, joylarga yetkazib berish va u yerda gumon qilingan holatlarda kasallikni tashxislashdan o‘tkazish yuzasidan ish joyida tajriba almashinuvini amalga oshirish, ya’ni ish joyida ko‘nikma hosil qilish yuzasidan videokonferensiya aloqasi orqali laboratoriya xodimlarining bilim saviyalari oshirilmoqda”, – deydi Rustamjon Ikromov.

• Maymun chechagi