Bugun, 27-aprel kuni Prezident Shavkat Mirziyoyev huzurida agrar sohada ta’limni yanada rivojlantirish masalalari hamda qishloq xo‘jaligi yo‘nalishidagi loyihalarning borishi yuzasidan yig‘ilishi bo‘lib o‘tmoqda.

Yig‘ilishda 2022-yilda Andijon, Jizzax, Namangan, Samarqand, Farg‘ona va Xorazm viloyatlarida agroxizmatlar markazlari tashkil etilib, 100 dan ortiq xizmatlar yo‘lga qo‘yilishi lozimligi ko‘rsatib o‘tilgan. Shuningdek:

– qishloq xo‘jaligida mablag‘larni boshqarish va monitoring qilish axborot tizimini ishga tushirish;

– yerlar va ekinlar hisobi hamda monitoringini yuritishni raqamlashtirish;

– 1-avgustga qadar 7 turdagi, 2023-yilda barcha turdagi subsidiya to‘lashni elektron tizimga o‘tkazish;

– suv balansi va sarfi hisobini yuritish hamda yerlarni to‘g‘ri sug‘orish ishlarini masofaviy monitoring qilish axborot tizimini 1-dekabrgacha Farg‘ona va Samarqandda, 2023-yilda barcha hududlarda joriy qilishga topshiriq berilgan. 

Shuningdek, Prezident yangi Xalqaro qishloq xo‘jaligi universiteti 2022–2023-o‘quv yilidan o‘z faoliyatini boshlashi zarurligini qayd etgan. 

Birinchi o‘quv yilida universitetda 7 ta mutaxassislik bo‘yicha 200 nafar talaba o‘qitiladi.

• Prezident
• Shavkat Mirziyoyev
• qishloq_xo‘jaligi