Toshkent viloyatining Qibray tumanida muqaddam sudlangan fuqaroning ijaraga olgan yer maydonidagi konteynerlardan 7 kilogramm marixuana, pnevmatik qurol va uchta patron aniqlandi. Bu haqda Davlat xavfsizlik xizmati xabar berdi.

Ma’lum qilinishicha, 1986-yilda tug‘ilgan fuqaro qishloq xo‘jaligi maqsadlarida uzoq muddatga ijaraga olgan yer maydoni chetidagi ikkita konteyner Davlat xavfsizlik xizmatining Toshkent shahar bo‘yicha boshqarmasi hamda Toshkent shahar Ichki ishlar bosh boshqarmasi xodimlari hamkorligida o‘tkazilgan tezkor tadbir davomida xolislar ishtirokida ko‘zdan kechirilgan.

Tekshiruvda konteynerlardan quruq holda saqlangan jami 7 kilogramm marixuana, IJ-38 rusumli pnevmatik qurol va 12 millimetr kalibrli uchta patron topilib, ashyoviy dalil sifatida olib qo‘yilgan.

Hozirda holat yuzasidan tergovga qadar tekshiruv harakatlari olib borilmoqda.