Raqobat qo‘mitasi tomonidan telekommunikatsiya xizmatlari ko‘rsatishda iste’molchilar huquqlari va manfaatlarini ta’minlash, shartnoma hamda tarif rejalariga kamsituvchi shartlarni kiritmaslik, shuningdek, abonentlarning xabardorligini oshirishga qaratilgan tizimli tahlil va nazorat ishlari olib borilmoqda.

“Telekommunikatsiya xizmatlarini ko‘rsatish qoidalari”ga muvofiq, mobil xizmatlar tarifikatsiyasi abonent holatini yomonlashtirmasligi va iste’molchi manfaatlariga zid bo‘lmasligi lozim.

Qo‘mitaga kelib tushgan ko‘plab murojaatlar asosida o‘tkazilgan o‘rganishlar davomida “UNITEL” MCHJ (Beeline) tomonidan taqdim etilayotgan aksariyat tarif rejalarida kunlik tarif joriy qilinganligi(oylik abonent to‘lovini yechish uchun hisobda mablag‘ yetarli bo‘lmaganda, avtomatik ravishda kunlik to‘lov yechish tizimiga ulanishi) va ushbu xizmatni mustaqil ravishda o‘chirish yoki faollashtirish imkoniyati mavjud emasligi aniqlandi. Bu esa, iste’molchilarning xabardorligisiz moddiy yo‘qotishlarga hamda e’tirozlariga sabab bo‘layotgan edi.

Qo‘mita ko‘rsatmasiga asosan, kompaniya tomonidan “kunlik abonent to‘lovi rejimiga o‘tish” xizmatini boshqarish imkoniyati joriy etilib, bu haqda rasmiy saytda e’lon qilindi hamda ushbu xizmat mavjud tarif rejalariga ulangan abonentlarga SMS xabarnoma yuborilib, xizmatni boshqarish usullari tushuntirildi.

Endilikda, abonentlar kunlik abonent to‘lovi yechish xizmatini:

USSD kod orqali;

Hambi mobil ilovasi;

Kompaniyaning aloqa markazi;

Savdo ofislari orqali o‘chirishi yoki faollashtirishi mumkin.

Raqobat qo‘mitasi “UNITEL” MCHJ (Beeline) tomonidan iste’molchilar huquqlarini himoya qilish yuzasidan berilgan ko‘rsatmani bajarilganini hamda o‘z abonentlari uchun xizmatlardan qulay va moslashuvchan tarzda foydalanish imkoniyatlarini yaratayotganini e’tirof etgan holda, iste’molchilarga xizmat ko‘rsatish shartlari bilan batafsil tanishib chiqish hamda o‘z huquq va majburiyatlariga rioya etishni tavsiya etadi.

Qo‘mita telekommunikatsiya sohasida iste’molchilar huquq va manfaatlarini himoya qilish bo‘yicha nazorat va amaliy chora-tadbirlarni doimiy ravishda davom ettiradi.

• Beeline
• Kommunikatsiya
• To'lov
• aloqa