Prezident Shavkat Mirziyoyev raisligida o‘tkazilgan videoselektor yig‘ilishida Sergeli va Yangihayot tumanlari aholisini uzoq yillardan buyon qiynab kelayotgan badbo‘y hid muammosi muhokama qilindi. Mas’ullarga 1-sentabrgacha oqova suv qabul qilish inshootiga zamonaviy filtrlash uskunalarini o‘rnatib, noqulay hidni bartaraf etish bo‘yicha topshiriq berildi.

Yig‘ilishda ushbu muammoni tizimli hal etish maqsadida kelgusi yildan Quyi Chirchiq tumanida quvvati 300 ming kub metr bo‘lgan zamonaviy suv tozalash inshooti qurilishi boshlanishi ham ma’lum qilindi. Bu Sergelidagi mavjud inshoot yuklamasini sezilarli darajada kamaytiradi.

Shuningdek, tumanda transport infratuzilmasini yaxshilash ishlari ham davom ettiriladi. Rejaga ko‘ra, 23 kilometr asosiy yo‘l qayta qurilib, 455 ta “aqlli” svetofor, 150 ta zamonaviy avtobus bekati hamda 10 ming o‘rinli avtoturargoh barpo etiladi.