O‘zbekistonda bolalarga nisbatan zo‘ravonlik va jinsiy tajovuzlar uchun javobgarlikni kuchaytirishga qaratilgan qonun loyihasi Qonunchilik palatasida birinchi o‘qishda konseptual jihatdan qo‘llab-quvvatlandi.

Qonun loyihasi “Adolat” sotsial-demokratik partiyasi fraksiyasining bir guruh deputatlari tomonidan ishlab chiqilgan. Hujjatda 14 yoshga to‘lmagan shaxsga nisbatan nomusga tegish yoki jinsiy ehtiyojni zo‘rlik ishlatib g‘ayritabiiy usulda qondirish uchun uzoq muddatli yoki umrbod ozodlikdan mahrum qilish jazosini belgilash taklif etilmoqda.

Qonunchilik palatasidagi muhokamada 14 yoshga to‘lmagan shaxslarning nomusiga tegish bo‘yicha 2022-yilda 85 ta, 2023-yilda 108 ta, 2024-yilda 129 ta va 2025-yilda 123 ta jinoyat ishi qo‘zg‘atilgani ma’lum qilindi. To‘rt yil davomida bunday jinoyatlar bo‘yicha jami 445 ta ish qo‘zg‘atilgan.

Loyihada jinsiy erkinlikka qarshi jinoyatlar sodir etgan shaxslarni javobgarlikka tortish yoki jazodan muddat o‘tganligi sababli ozod qilmaslik taklif etilmoqda. Shuningdek, zo‘ravonlikdan jabrlangan voyaga yetmaganlarni so‘roq qilish jarayonini videoyozuvga olish, ayrim protsessual harakatlarni maxsus tartibda o‘tkazish hamda jabrlangan yoki zo‘ravonlikka guvoh bo‘lgan bolalarga davlat hisobidan yuridik yordam ko‘rsatish mexanizmini joriy etish nazarda tutilgan.

Bundan tashqari, voyaga yetmaganlarga nisbatan ayrim jinoyatlarni og‘irlashtiruvchi holat sifatida belgilash, bolalarni tarbiyalash majburiyatini bajarmaganlik va shahvoniy shilqimlik uchun ma’muriy javobgarlikni kuchaytirish taklif qilinmoqda. Ta’lim muassasasida bolaga nisbatan zo‘ravonlik sodir etgan pedagog bilan mehnat shartnomasini bekor qilish uchun huquqiy asos yaratish ham ko‘zda tutilgan.