“AQSh prezidenti bilan savdo bojlarini pasaytirish masalasidagi muvaffaqiyatsiz muzokaralardan so‘ng, Shveysariya hukumati Oq uyga shveysariyalik sanoat magnatlaridan iborat delegatsiya orqali Donald Trampga qimmatbaho sovg‘alar yuborishga qaror qilgan. Bundan ko‘p o‘tmay, AQSH ushbu masalada Shveysariya tomoni bilan uchrashishga rozi bo‘lgan”, – deya xabar bermoqda Axios.

Delegatsiya tarkibiga qimmatbaho metallar savdosi bilan shug‘ullanuvchi Shveysariya treyderi MKS PAMP SA rahbari Marvan Shakarchi, lyuks toifadagi soatlar ishlab chiqaruvchi Rolex kompaniyasi rahbari Jan-Frederik Dyufur hamda qimmatbaho buyumlar ishlab chiqaruvchi Richemont kompaniyasi kuzatuv kengashi raisining raisi Yoxann Rupert kirgan.

“MKS PAMP SA boshlig‘i tomonidan Trampga qiymati 130 ming dollardan biroz oshiqroq bo‘lgan oltin quymasi berilgan, Dyufur esa AQSh prezidentiga stol ustiga qo‘yiladigan oltin soat sovg‘a qilgan. Aynan shu oltin soat Tramp uchun afzal ko‘riladigan sovg‘a sifatida ko‘rilgan”, — deydi nashr manbasi.

Qo‘shma Shtatlar Shveysariyadan import qilinayotgan mahsulotlarga nisbatan bojlarni 39 foiz darajasida belgilagan edi. Shveysariyalik sanoatchilarning Oq uyga tashrifidan keyin AQSh hukumati Shveysariya tovarlariga joriy etilgan bojlar miqdori 15 foizga tushirilganini e’lon qildi.

Donald Tramp avvalroq ham boshqa davlatlar vakillaridan qimmatbaho sovg‘alar qabul qilgan. Masalan, may oyida Qatar qirollik oilasi Trampga prezident borti sifatida foydalanish mo‘ljallangan Boeing 747-8 samolyotini sovg‘a qilgan edi. Avgust oyida Apple bosh direktori Tim Kuk siyosatchiga 24 karatli oltin asosga ega gravirovka qilingan shisha disk sovg‘a qilgan. Shuningdek, Oq uy rahbari oktyabr oyida Janubiy Koreya prezidenti Li Chje Myondan oltin tojni sovg‘a sifatida olgan.

• AQSh
• Prezident
• Shveysariya
• Tramp