Farg‘ona va Namangan viloyatlarida fuqarolarni “Umra” ziyoratiga noqonuniy yuborish bilan bog‘liq holatlar aniqlandi.

Farg‘ona viloyatining Qo‘qon shahrida faoliyat yurituvchi sayyohlik firmasi rahbari ikki nafar fuqaroni “Umra” safariga yuborishni va’da qilib, buning evaziga 2 200 AQSH dollari talab qilgan. Davlat xavfsizlik xizmati va Ichki ishlar organlari xodimlari hamkorligida o‘tkazilgan tezkor tadbir davomida u mazkur mablag‘ni olayotgan vaqtida ashyoviy dalillar bilan ushlandi.

Shuningdek, Namangan viloyatining Chortoq tumanida faoliyat yurituvchi sayyohlik firmasi xodimi ikki nafar fuqaroni “Umra” ziyoratiga yuborish evaziga 2 200 AQSH dollari talab qilgan. U oldindan 400 AQSH dollari olgan vaqtida huquqni muhofaza qiluvchi organlar xodimlari tomonidan ushlandi.

Mazkur holatlar yuzasidan tegishli shaxslarga nisbatan jinoyat ishlari qo‘zg‘atilgan. Hozirda tergov harakatlari olib borilmoqda.

Mutasaddi organlar fuqarolarni “Umra” ziyoratini tashkil etish bo‘yicha tegishli litsenziyaga ega bo‘lmagan shaxs va tashkilotlarning xizmatlaridan foydalanishda ehtiyot bo‘lishga chaqirmoqda.