Oliy Majlis Senatining navbatdagi yalpi majlisida nizosiz talablarni notarial tartibda rasmiylashtirish va ijro etish tartibini soddalashtirishga qaratilgan qonun ma’qullandi.

Yangi tartibga ko‘ra, qonunda belgilangan mezonlarga javob beradigan BHMning 1 000 baravarigacha, ya’ni hozirgi hisobda 420 million so‘mgacha bo‘lgan nizosiz talablar bo‘yicha notariusga murojaat qilish imkoniyati kengaytiriladi. Bunday talablarni sudga murojaat qilmasdan, notarius orqali rasmiylashtirish va ijroga yo‘naltirish mumkin bo‘ladi.

Shuningdek, notariuslar tomonidan rasmiylashtiriladigan QR-kodli ijro xatlarini elektron shaklda ijro organlariga bevosita yuborish imkoniyati yaratiladi. Bu qog‘oz hujjatlar bilan bog‘liq jarayonlarni qisqartirishga xizmat qiladi.

Qonunda sud hujjatlari ijrosini apellyatsiya, kassatsiya va taftish instansiyalarida vaqtincha to‘xtatib turish tartibiga ham o‘zgartirishlar kiritilmoqda.

Senatorlarning qayd etishicha, yangi tartib sudlarning ish yuklamasini kamaytirish, fuqarolar va tadbirkorlarning vaqt hamda xarajatlarini tejash, shuningdek, nizosiz talablarni tezroq rasmiylashtirish va ijro etish imkonini beradi.