Қозоғистондан январ воқеаларида иштирок этганликда гумонланиб 11 нафар ўзбекистонликка нисбатан жиноят иши қўзғатилган. Бу ҳақда Қозоғистон Бош прокурори Берик Асилов маълум қилди.

Унинг сўзларига кўра, жами 19 нафар хориж фуқаросига нисбатан айни шу мазмундаги жиноят иши қўзғатилган. Яъни ҳозирда Ўзбекистон фуқароларидан ташқари 4 нафар Россия, 2 нафар Қирғизистон, 1 нафар Тожикистон ҳамда 1 нафар Хитой фуқаролари тартибсизликлардаги иштироки учун терговга жалб қилинган.

Бош прокуратура хабарига кўра, ўша кунлари намойишга жами 50 минг атрофида аҳоли чиққан.

Эслатиб ўтамиз, бир муддат олдин мамлакатдаги январ воқеаларида иштирок этганликда айбланиб 14 нафар Ўзбекистон фуқароси ҳибсга олингани ҳақида хабар берилган ва шу муносабат билан Ўзбекистоннинг Нур-Султон шаҳридаги элчихонаси ҳибсга олинган ўзбекистонликларнинг ҳолати ҳақида маълумот олиш учун Қозоғистон ТИВга нота юборган эди.

Шунингдек, жорий йил 9 март куни Қозоғистонда январ воқеалари иштирокчиси бўлган яна бир ўзбекистонлик қўлга олингани ва унинг тартибсизликларда катта партиядаги қурол-яроғларни ўмаргани айтилган эди.

• Намойиш
• Ўзбекистон
• Қозоғистон
• январь