Қозоғистон Россия сиёсатидан рози бўлмаса, буни баралла айта олади. Бу ҳақда Президент ҳузуридаги стратегик тадқиқотлар институти халқаро тадқиқотлар бўлими раҳбари Асел Назарбетова журналистлар томонидан берилган саволга жавоб бериш вақтида айтиб ўтди.

“Янги геосиёсий вазиятда Марказий Осиё ҳамкорлиги: муаммолар ва истиқболлар” мавзусида бўлиб ўтган конференция доирасида журналистлар экспертларга юзланиб “Россия ва Украина ўртасидагикескинликдан кейин Қозоғистон ва Россия ўртасида масофа борми?”, деган саволни беришган.

Президент ҳузуридаги стратегик тадқиқотлар институти халқаро тадқиқотлар бўлими раҳбари Асел Назарбетова ушбу саволга қуйидагича жавоб берди:

“Россиядан узоқлаша бошладик, дейиш қийин. Бироқ, биз ўз позициямизни аниқлай оладиган нуқтада турибмиз. Яъни, Россия сиёсатига рози бўлмасак, албатта, буни миллий манфаатимиз нуқтаи назаридан баралла айтишимиз мумкин. Бу бизнинг мустақил суверен давлат эканлигимиздан далолат беради. Албатта, биз мамлакат билан иқтисодий алоқаларимизни узолмаймиз. Ушбу тизим бир неча йиллардан бери мавжуд. Шунинг учун бу тизимни бузиш биз учун қийин бўлади”, – деган у.

Шунингдек, Назарбетова Россия компанияларининг Қозоғистонда ваколатини бошлаши ҳақидаги саволга ҳам муносабат билдирган.

“Бу масала бўйича дунёвий санкцияларга қаттиқ амал қилган ҳолда эҳтиёткорлик билан ёндашилади”, – деган эксперт.

• Эксперт фикри
• Қозоғистон
• Россия
• Сиёсат